ब्रेकिंग

प्रवाशांना सुविधा मिळण्यासाठी उपाययोजना करा

Samruddhi Dhayagude
10 Jun 2025

प्रशासनाचे आगार प्रमुखांना आदेश

पुणे : सार्वजनिक वाहतूक व्यवस्थेवर अवलंबून असणार्‍या पीएमपी प्रवाशांना वेळेवर व चांगली सुविधा मिळावी, यासाठी पुणे महानगर परिवहन महामंडळाच्या (पीएमपीएमएल) आगार प्रमुखांनी अचूक नियोजन करावे. तसेच, वेळोवेळी बसची दुरुस्ती सुनियोजित करून प्रतिबंधात्मक उपाययोजनांची काटेकोरपणे अंमलबजावणी करावी, असे आदेश पीएमपी प्रशासनाकडून देण्यात आले आहे. पीएमपीच्या अध्यक्षा तथा व्यवस्थापकीय संचालक दीपा मुधोळ-मुंडे यांनी तशा सुचनाच दिल्या आहेत.

पुणे, पिंपरी-चिंचवड आणि पुणे महानगर प्रदेश विकास प्राधिकरणातील (पीएमआरडीए) उपनगरांपर्यंत धावणार्‍या पीएमपीचे एक जूनपासून प्रवासी भाडे वाढले आहे. मात्र, सेवेत कुठलाही फरक पडला नाही. प्रवाशांना स्थानक तसेच थांब्यांवर प्रतीक्षा करावी लागत असल्याचे चित्र आहे.

पीएमपीच्या वेळापत्रकानुसार मार्गांवरील फेर्‍यांचे नियोजन सुरू असल्याचे पीएमपीतील अधिकार्‍यांकडून सांगण्यात येते. मात्र, प्रत्यक्षात काही फेर्‍या रद्द केल्या जात आहेत. याचा फटका दररोज पीएमपीने प्रवास करणार्‍या प्रवाशांना बसत आहे. तांत्रिक बिघाडाचे कारण दिले जात असले, तरी जुन्या बस वेळोवेळी दुरुस्त कराव्या किंवा वाहतूक मर्यादा ओलांडलेल्या बस सेवेतून काढून टाकाव्या, अशी मागणीही यावेळी प्रवाशांकडून करण्यात आली आहे.